کراچی ( ڈیلی آن لائن )سندھ کے صوبائی وزیر شرجیل میمن نے کہا ہے کہ لوگوں کو مسائل کا حل چاہیے، انتشار کی سیاست نہیں ،ملک میں افراتفری اور انتشار پیدا کرنے کی کوشش کی جا رہی ہے۔ کراچی میں پریس کانفرنس میں شرجیل میمن نے کہا کہ عوام سے کیے گئے وعدوں کو پورا کریں گے، عوام کو یہی فکر ہوتی ہے کہ ان کو ریلیف کیسے ملے گا۔ کسان، تنخواہ دار طبقہ، عام شہری ریلیف مانگ رہے ہیں، 20 ارب روپے سے زائد کے کسان کارڈ فراہم کیے گئے تاکہ انہیں ریلیف ملے، بے گھر ہونے والے لوگوں کو ہر صورت 21 لاکھ گھر بنا کر دیں گے۔صحت کی مزید سہولتیں فراہم کرنے کے کوششیں کر رہے ہیں، نوجوانوں کے لیے ای ٹیکسی متعارف کروانے جا رہے ہیں، نوجوانوں کو ای ٹیکسی کا مالک بنائیں گے، پروگرام بنا رہےہیں کہ ای ٹیکسی کے لیے کچھ پیسے سندھ حکومت، کچھ بینک اور کچھ نوجوان دیں اور ٹیکسی کے مالک بن جائیں۔ اُنہوں نے کہا کہ پانی کا جو مسئلہ کسانوں کو درپیش ہے اسےحل کرنے کی کوشش کر رہے ہیں، وزیرِ صحت صوبے میں صحت کے درپیش مسائل کو حل کرنے کی کوشش کر رہی ہیں، چیزیں بہتری کی طرف جا رہی ہیں۔ سندھ میں محکمۂ ٹرانسپورٹ کی زمینوں پر بڑے پیمانے پر قبضے ہیں، سندھ کا محکمہ ٹرانسپورٹ زمینوں سے قبضے ختم کروانے کے لیے اقدامات کر رہا ہے، پیپلز پارٹی گورنر راج کے حق میں نہیں۔ جو بھی فیصلے حکومت کرتی ہے بہتری کے لیے کرتی ہے، وزارتیں کسی کی جاگیر نہیں ہیں، جس کے پاس جو بھی وزارت آئے وہ اس میں بہتر کام کرے۔ ” جنگ ” کے مطابق شرجیل میمن کا کہنا تھا کہ کے پی میں 90 سے زائد لوگوں کی شہادت ہوئی، اس صوبے کا وزیرِ اعلیٰ کہاں ہے؟ تمام صوبوں کی ترجیح عوامی مسائل ہونے چاہیئں، عوام نے ووٹ دیا ان کے مسئلے پر پہلے غور کرنا چاہیے۔ کے پی کے میں معاملہ گمبھیر ہے تو جو بھی عوام کے حق میں بہتر ہو وہ فیصلہ کیا جائے۔عوام نے ان کی 24 نومبر کی کال کو مسترد کر دیا، سندھ سے کوئی رضاکارانہ طور پر ان کے احتجاج کے لیے نہیں نکلا، انٹرنیٹ بند ہونے سے نقصان کس کا ہوا؟ جیل میں بیٹھ کر یہ چاہتے ہیں کہ عوام سکون سے نہ بیٹھیں، لوگ اب ان سے بیزار آ چُکے ہیں، لوگوں کو اپنے مسائل کا حل چاہیے، انتشار اور گالم گلوچ کی سیاست نہیں چاہیے۔یہ عوام کی بہتری کے لیے نکلیں تو عوام بھی ساتھ دیں گے، ان کا ایجنڈا ہے کہ بس ان کو جیل سے باہر نکالا جائے۔
0
