میرپور(بی بی سی)پاکستان کی سب سے بڑی فاصلاتی نظام تعلیم پرمبنی علامہ اقبال اوپن یونیورسٹی نے سمسٹر بہار 2024ء کے داخلوں کا شیڈول جاری کردیا۔تفصیلات کے مطابق ریجنل ڈائریکٹر علامہ اقبال اوپن یونیورسٹی ریجنل کیمپس میرپور شیخ فیصل شہزاد نے آگاہ کیا کہ مرحلے کے داخلے ملک کے چاروں صوبوں، آزاد کشمیراورگلگت بلتستان میں ایک ساتھ 15جنوری 2024 سے شروع ہونگے، اس مرحلے میں پیش کئے جانے والے پروگرامز میں میٹرک(جنرل)، میٹرک درس نظامی(ثانویہ عامہ)، ایف اے(جنرل)، آئی کام، ایف اے درس نظامی(ثانویہ خاصہ)، سرٹیفکیٹ کورسز، بی ایس(فیس ٹو فیس)، ایم فل اور پی ایچ ڈی پروگرامز شامل ہونگے۔تمام پروگراموں کے داخلہ فارمز اور پراسپکٹس یونیورسٹی کی ویب سائٹ پر15جنوری سے آن لائن دستیاب ہوں گے۔وائس چانسلر اوپن یونیورسٹی (Allama Iqbal Open University) پروفیسرڈاکٹرناصر محمود اور ڈائریکٹریٹ آف ریجنل سروسز کی ہدایت پر میرپور کیمپس میں فیسلیٹیشن ڈیسک قائم کر دیا گیا جس پر طلبا مفت آ ن لائن داخلہ اپلائی کر سکیں گے۔دنیا بھرمیں مقیم پاکستانی وبین الاقوامی طلبہ بھی میٹرک، ایف اے اور آئی کام ڈگری پروگراموں میں داخلہ حاصل کرکے تعلیمی استعداد کار میں اضافہ کرسکیں گے۔بیرون ممالک میں یونیورسٹی داخلے آن لائن سسٹم کے تحت کیے جائیں گے، انکے لئے داخلوں سے لیکر امتحانات تک تمام سرگرمیاں آن لائن ہونگی۔واضح رہے کہ یونیورسٹی کی داخلہ پالیسی کے مطابق بی ایس،ایم فل اور پی ایچ ڈی پروگراموں میں داخلہ حاصل کرنے کے لئے آن لائن اپلائی کرنا لازمی ہے جبکہ میٹرک اور ایف اے پروگراموں میں داخلہ فارم مینول اور آن لائن دونوں طریقوں سے جمع کیا جاسکے۔مزید معلومات کیلئے 05827-960029 05827-960030 پر رابطہ کریں۔
0
