“نہ وہ لوگ رہے نہ وہ وقت”
میرے ہر اور محبت کی ہوائیں سرسرا رہی ہیں ۔۔
کچے اور بڑے سے صحن پر پانی کے ترونکے کی باس روح میں تازگی بھر رہی ہے ۔۔۔
گرمیاں رخصت ہوئیں اور جاتے جاتے ہمارا ہاتھ سردیوں کو تھما گئی ہیں ۔۔۔
پھر سے آنے کا وعدہ کر کے۔۔۔
ہاں مگر سردیاں ابھی بہت محبت سے پیش آرہی ہیں اپنی شدت شاید اس لیے بھی نہیں دکھا رہیں کہ ابھی ابھی گرمی کی حدتیں رخصت ہوئی ہیں سردی کسی استاد کی طرح جو اپنے شاگردوں کو آغاز میں ذرا نرمی سے پھر بعدمیں ذرا۔۔۔۔۔۔۔۔۔۔۔۔۔۔۔۔
۔ بے شک سردی کا یہ انداز بہت مول لینے والا ہے۔۔۔۔۔
میرے گاؤں کا منظر عجیب حسن پیش کر رہا ہے ۔۔۔۔۔
ان دنوں کھیتوں کے لہلہاہٹ آنکھوں کو خیرہ کیے دے رہی ہے ۔۔
تاحدِ نگہءسرسوں کے پھول ہی پھول ۔۔۔گنے کے کھیت منہ میں میٹھا رس گول رہے ہیں ۔
ماشاءاللہ اس سال چاول کی فصل بھی بہت اچھی ہوئی کھیتوں کے پاس سے گزرتے چاول کی خوشبو لبوں پر مسکراہٹ بھرنے کو کافی۔۔۔۔۔۔۔۔۔۔۔۔۔ سردیاں اپنے پلو کے ساتھ کیسی کیسی خوشیاں باندھ لاتی ہیں “رو”کی کھیر ساگ مکئی کی روٹی۔۔۔۔۔۔۔ اور تو اور صحن میں۔۔۔۔ کمروں میں۔۔۔۔۔ ہر جگہ۔۔۔۔ چھلیوں کے ڈھیر ہمارا ننھا سا دماغ ان ڈھیروں کو پہاڑ بنا کر دکھارہا ہے بہت پر لطف ہے سب ۔۔۔۔۔۔۔۔۔۔
ماشاءاللہ کتنی خوبصورت تتلی ہے۔۔۔مجھے پکڑنا ہے اسے ہر صورت۔۔۔۔۔۔ کدھر گئی ابھی تو یہیں تھی۔۔۔۔۔۔۔ سرسوں کے پھولوں میں چھپ گئی۔۔۔۔ یہ ہے ادھر ۔۔۔۔۔ہائے۔۔۔۔۔۔ میرے ہاتھوں میں کیوں نہیں آرہی۔۔۔۔ آئے ہائے وہ تو اڑ گئی ۔۔۔۔۔۔۔۔۔۔۔۔۔۔۔۔
یہ کیسی خوشبو ہے میٹھی سی کچھ یاد دلا رہی ہے ۔۔۔۔۔۔۔۔۔۔وہ گنے کے کھیت سے پرے دھواں بھی اٹھ رہا ہے ارے وااااہ گڑھ بن رہا ہے۔ ۔۔۔۔۔۔۔۔۔
اپنے کھیتوں پر جانا بھی کسی سوغات سے کم نہیں امی جی اور تائی اماں کی زیر نگرانی چھٹی والے دن چھوٹی بڑی فوج کا کھیتوں پر جانا دور دور تک ہریالی ہی ہریالی۔۔۔۔۔۔۔۔۔۔۔۔۔۔۔۔ امی جی اور تائی اماں نے ساری فوج میں کام تقسیم کر دئیے ہیں۔۔۔۔۔ بڑی فوج کی سالاری باجیوں کو سونپ کر امی جی اور تائی اماں چھوٹی فوج کو لے کر ایک بڑےسے ہرے بھرے کھیت میں گھس آئے ہیں۔ ۔۔
میں تو سب سے زیادہ سمجھدار ہوں اور میری خوشی بھی دیدنی ہے کیونکہ جو پتے مجھے نمونے کے طور پر پکڑائے گئے تھے میں اسی طرح کے پتے توڑ توڑ کر لا کے دے رہی ہوں ۔۔۔۔۔۔۔۔۔تائی اماں سب کو میری مثال دے رہے ہیں۔۔۔۔ پچھلے دن تتلی نہیں پکڑی گئی تھی اور آج میں تتلی کی طرح سارے کھیت میں بھا گ رہی ہوں ۔۔گویا کہ اڑ رہی ہوں۔۔۔۔۔۔۔ ارے میں تو کھیت کے دوسری طرف نکل آئی۔۔۔۔۔ اوووووو میں نے تو پانی کی ندی دریافت کر لی ۔۔۔۔۔۔۔
ساری فوج کو ہی بلا لیا۔۔۔۔۔۔۔۔۔۔۔۔۔۔۔۔۔۔۔
تائی اماں کی ڈانٹ کا غم تب رفو ہوا جب اسی بہتی ندی سے گاجر ،مولی، شلجم دھو کر سب نے کھائے اور تب ہماری اکڑ کا عجیب ہی سماں تھا ۔۔۔۔
اس وقت تو اور مزہ آیا جب اسی ندی کے کنارے دستر خوان بچھ گیا ۔۔۔۔۔۔
سب چھوٹے بڑے منہ ہاتھ دھونے میں مشغول ہوئے کوئی ندی کے ادھر آرہا ہے کوئی ندی کے ادھر جا رہا ہے ۔۔۔۔۔۔۔۔۔
سارے دن کی ہماری کارگردگی بھی کافی اچھی رہی مجھے یک دم سے اپنا قد امی جی اور تائی اماں کی بڑی سپہ جتنا لگنے لگا ندی بھی چھوٹی ہو گئی اور میں کود پڑی ۔۔۔۔۔۔دھڑام۔۔۔۔۔۔۔۔۔۔ . . . پانی میں۔۔۔۔۔۔۔۔۔۔۔۔۔اماں جی مجھے کام پر جانا ہے۔۔۔۔میرے بیٹے کی آواز نے چونکا دیا
ناجانے اس کے بعد کیا ہوا مجھے یاد نہ رہا ۔۔۔۔۔۔
۔۔۔۔۔۔۔ جلدی جلدی کھانا دیجئے .۔۔۔۔۔۔۔۔۔۔۔۔۔ .
بیٹا کام پر کب کا جا چکا ۔۔۔۔
کلاک رات کے ساڑھے آٹھ کا وقت بتا رہا ہے۔۔۔۔۔۔۔
سارے دن کی تھکی ہاری بستر پر آئی ۔۔۔۔۔۔تو ۔۔۔۔۔
یادوں کا ایک جہان لے کر ۔۔۔۔۔۔۔میری تنہائی نے مجھے اپنی باہوں میں بھر لیا تھا ۔۔۔۔میں بچپن کی پگ ڈنڈیوں پر سفر کرنے لگی تھی۔۔۔۔۔۔۔۔۔۔۔۔۔
نومبر کے اوائل دنوں کی راتیں اسلام آباد جیسے شہر میں قدرے سرد ہونا شروع ہو چکی ہیں۔
یہ سب تو ایک طرف دھڑام کی آواز پر چونکی تھی بیٹے نے کام پر جانا تھا
میں کہاں تھی۔۔۔۔۔ ہر طرف خوشیاں اور عید کا سا سماں تھا۔۔۔۔۔۔۔۔ سرسوں کے پھول ۔۔۔۔۔۔ تتلی ۔۔۔۔۔۔ سرسوں کی اوٹ میں اٹھتا دھواں۔۔۔۔
میٹھی سی خوشبو۔۔۔۔۔۔۔چاولوں کی باس۔۔۔۔۔
گنے کے کھیت۔۔۔۔ کچے کمرے۔۔۔۔۔ بڑا سا صحن۔۔۔۔۔ اور صحنوں کی رونق۔۔۔۔۔۔ ابھی تو بہت کچھ تھا باقی ۔۔۔۔۔۔۔۔۔۔
میرے ہاتھ کیوں نہیں آرہا۔۔۔۔۔۔۔وہ سرا جو ابھی ابھی ہاتھ سے چھوٹا۔ ۔۔۔۔۔۔۔۔۔۔۔
نہ بیماریاں نہ دشمنیاں نہ منافقت نہ دکھاوا ۔۔۔۔۔۔اور تو اور نہ ہی ۔۔۔۔۔ڈر بے نما گھر۔۔۔۔۔
آہ۔ ۔۔۔۔۔۔۔۔۔۔۔۔۔
کہاں چلا گیا وہ سب ۔۔۔۔۔ابھی ابھی تو میری دسترس میں تھا سبھی کچھ۔۔۔۔۔
کہاں گیا۔۔۔۔۔ کہاں گئے وہ لوگ سبھی وہ وقت۔۔۔۔۔
تتلی کی طرح اڑ گئے۔۔۔۔۔
میرے ہاتھ خالی رہ گئے پھر سے۔۔۔۔۔۔۔۔۔۔
ہائے کہ نہ وہ لوگ رہے نہ وہ وقت ۔۔۔۔۔۔سیدہ کنول کاظمی
0
