تدریسی نصاب اور طلبا کے مساٸل
تحریر: ماہم حیا صفدر
زیادہ تر سرکاری و غیر سرکاری تعلیمی اداروں میں تعلیمی سال کا اختتام نتاٸج کے ساتھ ہو چکا ہے۔ نٸے تعلیمی سال کے آغاز کے ساتھ ہی طلبا نہایت جوش و خروش سے تعلیمی اداروں کا رخ کرتے نظر آتے ہیں۔ اس دوران ہر طالب علم کے دل میں یہ تجسس انگراٸیاں لے رہا ہوتا ہے کہ جانے اب نٸے تعلیمی سال میں اسے کیا کیا مضامین پڑھنے کو ملیں گے۔ طلبا کی نٸی جماعتوں میں ترقی اور نٸے سرے سے داخلہ لینے والوں کی کثیر تعداد تعلیمی سال کا آغاز ہوتے ہی تعلیمی اداروں کا رخ کرتی ہے۔ بسا اوقات یہ دیکھنے میں آیا ہے کہ جوں ہی ان طلبا کو کتابیں فراہم کی جاتی ہیں ان میں سے بیشتر کا جوش و خروش ٹھنڈا پڑ جاتا ہے۔ جس نصاب کو وہ اپنے لیے تفریح اور سیکھ کا وسیلہ سمجھے ہوتے ہیں وہ ان کے لیے دردِ سر کا باعث بن جاتا ہے۔
سرکاری تعلیمی ادارے ہوں یا غیر سرکاری تعلیمی ادارے ہر جماعت کا نصاب الگ ہوتا ہے۔ ہمارے تدریسی نصاب میں یہ چیز واضح دیکھی اور محسوس کی جاتی ہے کہ نصاب بناتے وقت تمام طلبا کی ذہنی استعداد کو ملحوظِ نظر نہیں رکھا جاتا۔ حال ہی میں کچھ جماعتوں کی تعلیمی کتب دیکھنے کا اتفاق ہوا۔ پراٸمری اور مڈل کلاسز کا نصاب دیکھتے ہی مجھے دردِ سر نے آ لیا۔
اگر ہم ایک نظر اپنے تعلیمی نظام کا جاٸزہ لیں تو یہ حقیقت واضح ہوتی ہے کہ پلے گروپ، نرسری وغیرہ میں داخل ہونے والے بچوں کی عمر ڈیڑھ دو سال ہوتی ہے۔ اس عمر میں بچے نہ صرف جسمانی بلکہ ذہنی بلوغت کی حد سے بھی بہت پرے ہوتے ہیں۔ اس عمر میں بچے نہ تو مکمل صفاٸی سے بول پاتے ہیں نہ دیگر افعال سر انجام دینے کے قابل ہوتے ہیں۔ جس عمر میں بچوں کو اپنے آپ کو سنبھالنا، بولنا، کھانا پینا اور دیگر انتہاٸی ضروری افعال سکھانے کی ضرورت ہوتی ہے اس عمر میں ان پر انگریزی، ساٸنس، ریاضی، جنرل نالج و دیگر مضامین کے غیر متوازن تدریسی نصاب کا بوجھ ڈال دیا جاتا ہے۔ یوں جو دور بچوں کی ذہنی نشوونما کی آبیاری کا ہوتا ہے وہ مشکل نصاب کے بوجھ سے لدا ہوتا ہے۔ ہر گزرتے سال کے ساتھ تعلیمی اداروں کی ابتداٸی جماعتوں میں داخلوں کی عمر کی حد کم سے کم ہوتی جا رہی ہے۔ یہی وجہ ہے پراٸمری اور مڈل کلاسز کے طلبا کے اذہان بھی مکمل بلوغت کی سرحد سے پرے ہوتے ہیں۔
ہمارے تعلیمی نظام کے مطابق ایک دس بارہ سالہ بچہ (جس کے کھیلنے کودنے کے بھی یہی دن ہیں) اردو، انگریزی، ساٸنس، ریاضی، جغرافیہ، تاریخ، اسلامیات، تعلیم القرآن، جنرل نالج، مطالعہٕ پاکستان وغیرہ جیسے نو دس مضامین کو بیک وقت پڑھنے، سمجھنے اور ان میں زیادہ سے زیادہ نمبر لے کر انہیں پاس کرنے کا اہل ہونا چاہیے۔ ہر گزرتے سال کے ساتھ مضامین کی تعداد میں ہی نہیں ہر مضمون کے نصاب میں بھی اضافہ ہو رہا ہے۔ یہ تبدیلی نصاب میں اضافے تک ہی محدود نہیں ہے۔ نصاب کی تیاری میں مشکل پسندی کو فوقیت دی جاتی ہے۔ ابتداٸی جماعتوں میں ہی مضامین کے نصاب میں انتہاٸی مشکل اور سنجیدہ موضوعات کی شمولیت طلبا کے لیے مشکلات کا باعث بنتی ہے۔ ستم تو یہ ہے کہ جو بچے ابھی ٹھیک سے بولنا بھی نہیں سیکھ پاٸے ہوتے انہیں ریاضی کے پیچیدہ فارمولوں اور مشکل ساٸنسی اصطلاحات کے ساتھ اپنا وہ ذہن لڑانا پڑتا ہے جو ابھی تک مکمل نشوونما ہی نہیں پا سکا ہوتا۔
تدریسی نصاب کی پیچیدگیاں بچوں کی زندگی کو بھی پیچیدہ کر دیتی ہیں۔ سکول اور ٹیوشن کے اوقات کار میں ملنے والا ذہنی دباٶ انہیں بہت سی نفسیاتی الجھنوں کا شکار کر دیتا ہے۔ ثقیل اصطلاحات پر مشتمل مشکل نصاب کو سمجھنے سے قاصر رہنے والے بچے تعلیمی دوڑ میں اساتذہ اور والدین کو مطمٸن کرنے کے لیے حتی المقدور سعی کرتے ہیں۔ جب وہ اپنا نصاب سمجھ نہیں پاتے تو ناچار اسے رٹنے کی کوشش کرتے ہیں۔ وہ بنا مفہوم و مطالب سمجھے ان اصطلاحات کو رٹ لیتے ہیں۔ وہ اس حقیقت سے نا آشنا ہوتے ہیں کہ یہ عمل آٸندہ عملی زندگی میں ان کے کسی کام نہیں آٸے گا۔ رٹہ سسٹم بچوں کی ذہنی استعداد کو مفلوج کر کے رکھ دیتا ہے۔ ایسے بچوں کے اذہان پر کھلنے والے تخلیقی ابواب قبل از وقت بند ہو جاتے ہیں۔ دس دس مضامین کے اسباق، کلاس ورک اور ہوم ورک وغیرہ کے بوجھ تلے دبے ان بچوں کا ذہن مختلف نفسیاتی الجھنوں کو جنم دیتا ہے جو ساری زندگی ان کے ساتھ ساتھ رہتی ہیں۔ یہ بچے اپنے سر پر ہر وقت ایک تلوار لٹکی ہوٸی محسوس کرتے ہیں۔ میکانکی انداز میں کتابیں رٹ لینا ان کی فطری صلاحیتوں کو گہنا کے رکھ دیتا ہے۔ ہر طالب علم ہر مضمون میں بہترین نہیں ہو سکتا۔ مگر ہمارے تدریسی نصاب میں اس کے لیے کوٸی گنجاٸش موجود نہیں ہے۔ یہی وجہ ہے کہ بیشتر طلبا اپنے تعلیمی دورانیے کے اختتام تک اچھے خاصے نفسیاتی مریض بن چکے ہوتے ہیں۔
ہمارا تدریسی نصاب صرف ذہنی الجھنوں کا ہی باعث نہیں بنتا۔ اس کے دور رس نتاٸج ایک بچے کی پوری شخصیت کی تعمیر پہ پڑتے ہیں۔ ہم جانتے ہیں کہ دماغ جسم کا کنٹرول یونٹ ہے۔ ہمارے جسم کے تمام اعضا دماغ سے ملنے والی ہدایات پر عمل کرتے ہیں۔ ہمارے جسم میں واقع ہونے والے تمام افعال مختلف دماغی حصوں کے تابع ہوتے ہیں۔ جب ایک بچے کا شعور و لاشعور فیل ہو جانے کے خوف تلے دبا رہے گا تو اس کی دماغی حالت کیا ہو گی؟ مشکل نصاب کا بوجھ اس کے دماغی خلیوں کی تباہی کا باعث بنتا ہے۔ دماغ کا یاداشتیں بنانے والا حصہ غیر ضروری بوجھ برداشت نہیں کر پاتا۔ دماغ کا تخلیقی ارادوں کو جنم دینے والا حصہ عدم استعمال کے باعث زنگ آلود ہو جاتا ہے۔ جسم کی تمام تر طاقت و قوت مشکل و پیچیدہ اصطلاحات کو زبردستی یاداشت کا حصہ بنانے میں صرف ہو جاتی ہے۔ یوں دیگر تمام جسمانی اعضا کو ان کی درکار شدہ تواناٸی کی مقدار نہیں پہنچ پاتی اور وہ بھی سستی و بیماری کا شکار ہو جاتے ہیں۔ ذہنی دباٶ کے دور رس اثرات طلبا کے لیے بہت مہلک ثابت ہوتے ہیں۔
ضرورت اس امر کی ہے کہ تدریسی نصاب کو ترتیب دیتے ہوٸے طلبا کی عمر، ان کی ذہنی استعداد سمیت دیگر عوامل کو بھی ملحوظِ نظر رکھا جاٸے۔ ہر جماعت کے نصاب میں آسان اور مشکل اصطلاحات کا ایک خاص تناسب رکھا جاٸے تاکہ مختلف ذہنی استعداد رکھنے والے مختلف بچوں کے لیے آسانی پیدا ہو۔ اگر میٹرک اور ایف ایس سی کے نصاب کی اصطلاحات کو پراٸمری اور مڈل کے نصاب میں شامل کر دیا جاٸے گا تو نہایت ہی تباہ کن نتاٸج برآمد ہوں گے۔ اس ضمن میں اگر فی الفور مثبت اقدامات نہ اٹھاٸے گٸے تو یہ پیچیدہ تدریسی نصاب تعلیمی اداروں میں تخلیقی صلاحیتوں سے مالا مال نسلوں کو تیار کرنے کی بجاٸے اپنے نازک کندھوں پر بھاری بھرکم بستوں کا بوجھ اٹھانے والی ذہنی طور پر پسماندہ نسلوں کو تیار کرتا رہے گا۔
